الأسبوع الماضي...
بعد يوم متعب .... نمت بعمق ...
وبعزّ النوم "على قولة فيروز" ، فقت على صوت عالي... فقت مرعوب... لأن الصوت كان عالي لدرجة أنو حسيت الغرفة امتلت بهالصوت ... الصوت كان واضح، صوت إختي حنان، عم تعيط كأنو فوق راسي: إمييييييييييييييييييي يا إمي !!!
فقت مرعوب والصوت ماعم بروح من بالي، لأن كان عالي ومالي الغرفة...
يا الله شو القصة ؟؟ قمت من التخت... صرت أمشي بالبيت متل المجنون !! صاير شي لأمِّي ؟! صاير شي لإختي حنان ؟!
شعلت الضو، شفت الساعة: 4 فجراً ... أكيد نايمين ! ما معقول اتصل فيهم هلق لأن ممكن يكون الموضوع هلوسة ! أو يمكن حلم ... مارح فيِّقهم ... بس الصوت ماكان صوت حلم ! كان صوت إختي حنان... سمعتو بكل وضوح وكان مالي الغرفة......
خلص خليني أنطر لبكرا الصبح عالتلفون الصباحي اليومي مع أهلي... وانشالله مابكون صاير شي ...! انشالله ...
تاني يوم الساعة 11 الصبح عندي حكيت مع أمي... كانت لسا أول مافايقة...
- صباح الخير ماما... كيفك ؟
- - الحمدالله كيفك إنت؟
- الحمدالله ... شو في أخبار عندكم ؟
- - والله يا ماما إختك كانت موجوعة مبارح كتير
- له ليش لك أمي؟ شو صاير ؟!؟!؟!!؟
- - مبارح بالليل كانت أختك عم تتوجع كتير من معدتها و شي الساعة 3 صرخت لإلي بصوت عالي: إمييييييييي يا أمي ....
"أنا هون... نشف دمي؟ " ... وسألتها: ماما شو عم تحكي ؟؟؟
- - إي والله يا إمي، صرخت من وجعها بس أنا كنت نايمة ومافقت ... بس حكتلي تاني يوم أنو يا ماما عيطلك بصوت عالي بس مافقتي!!!!!
اتصلت بحنان الضهر وسألتها عن تفاصيل القصة... قالتلي: ياموريس حسيت روحي كانت عم تطلع من الوجع وصرخت صوت عالي للماما: إمييييييييي يا إمي... صرخت الصوت من كل قلبي ! من كتر الوجع ! وكانت شي الساعة 3 بسوريا ... " يعني 4 بدبي !"
أنا مالقيت تفسير ليلي صار...
هل هي صدفة؟؟ أكيد لأ... مستحيل هيك صدفة تصير...
هل هي رسالة ؟ من مين؟ ولشو ؟
كيف وصل صوت إختي لعندي ؟! هل هي ظاهرة من ظواهر الحياة يلي لسا ما فهمها الإنسان.؟! ... أنا ماعم أفهم ...
يلي عندو تفسير يخبرني ...
موريس عبد
صاحب ومدير موقع سوق سورية الموقع الأفضل للإعلانات المبوّبة المجانية في سورية
